Մոնիկա Ավանեսյանը, ով «Շոկո ֆաբրիկա» երգով կներկայացնի Հայաստանը «Մանկական Եվրատեսիլ 2013»–ին, մտադիր է շատ լավ ներկայանալ և զբաղեցնել բարձր տեղ։
«Մանկական Եվրատեսիլ 2013» 11–րդ ամենամյա մանկական երգի մրցույթը կանցկացվի նոյեմբերի 30–ին Կիևում։ Մրցույթին կմասնակցի 12 երկիր` Հայաստանը, Վրաստանը, Ադրբեջանը, Բելառուսը, Ռուսաստանը, Ուկրաինան, Մոլդովան, Մակեդոնիան, Մալթան, Նիդեռլանդները, Սան Մարինոն և Շվեդիան։
«Մեր թիմը շատ ուրախացավ, երբ իմացավ, որ ներկայացնելու է Հայաստանը Եվրատեսիլին։ Ես ցանկանում եմ շատ լավ ներկայացնել իմ հայրենիքը Կիևում և զբաղեցնել բարձր տեղ։ Մենք շատ ենք պարապել, ամեն օր պատրաստվել ենք ելույթին», – ասաց Մոնիկան Երևանում կայացած մամուլի ասուլիսի ժամանակ։
Այս տարի մրցանակ կհանձնվի ոչ միայն հաղթողին, այլև երկրորդ և երրորդ տեղերը զբաղեցրած մասնակիցներին։
Նոյեմբերի 25–ին Կիևում կայանալիք վիճակահանության արդյունքում հայտնի կդառնա, թե որ համարների ներքո ելույթ կունենան մրցույթի մասնակիցները։
Մանկական Եվրատեսիլին Հայաստանից ստացվել է 82 մասնակցության հայտ, որոնցից 12–ն անցել է ընտրական փուլ։ Հաղթողը որոշվել է հեռուստատեսային քվեարկության և պրոֆեսիոնալ ժյուրիի ընտրության արդյունքում։ Ներկայացված երգերի առավելագույն տևողությունը չպետք է գերազանցեր երեք րոպեն։
«Շոկո ֆաբրիկա» երգի երաժշտության և խոսքերի հեղինակները Մոնիկա Ավանեսյանն ու նրա վոկալի ուսուցիչ Էմմա Ասատրյանն է։ Գործիքավորման հեղինակը Մարտին Միրզոյանն է, ելույթի բեմադրող ռեժիսորը Վահան Բադալյանն է, բեմական հագուստի հեղինակը Լիլիթ Մակարյանն է։
Հայկական պատվիրակության ղեկավար Գոհար Գասպարյանի խոսքերով` Հայաստանի մրցութային երգը տարբերվում է առանձնահատուկ ոճական գործիքավորմամբ։
«Բեմադրությունը «համեղ է» լինելու։ Ելույթի ընթացքում թիմի երեխաները կներկայացնեն հայկական շոկոլադե ֆաբրիկան ու նրա աշխատողներին», – ասաց Գասպարյանը։
Նա նշեց, որ չնայած հայ մասնակցի լավ պատրաստված լինելուն, նման մրցույթների արդյունքները միշտ անկանխատեսելի են։
Երգի համահեղինակ Էմմա Ասատրյանն իր հերթին նշեց, որ մրցութային երգի մեծ մասը կհնչի հայերեն, իսկ գործիքավորումը համապատասխանում է նորաձև երաժշտական միտումներին։
Հայաստանը «Մանկական Եվրատեսիլին» մասնակցում է 2007թ.–ից։ Առաջին անգամ մրցույթին Հայաստանը ներկայացրել է «Արևիկ» մանկական խումբը` «Երազանք» երգով` զբաղեցնելով երկրորդ տեղը։ 2008թ.–ին Մոնիկա Մանուչարյանը ներկայացել է «Իմ երգի հնչյունները» երգով և զբաղեցրել ութերորդ տեղը։
2009թ.–ին Լաուրա Հայրապետյանն իր «Բարսելոնա» երգով նվաճեց երկրորդ տեղը`այդ տեղը կիսելով Ռուսաստանի ներկայացուցիչ Եկատերինա Ռյաբովայի հետ։ Մեկ տարի անց «Մանկական Եվրատեսիլ» մրցույթին Մինսկում հաղթող ճանաչվեց Հայաստանը ներկայացնող ԼՂՀ 12–ամյա քաղաքացի Վլադիմիր Արզումանյանը, իսկ 2011թ.–ին մրցույթն անցկացվեց Երևանում, որտեղ Հայաստանը ներկայացրեց պատանի երգչուհի Դալիթան։
Compass Band հայկական խումբը, որը 2012թ.–ին Ամստերդամում ներկայացրեց Հայաստանը, զբաղեցրեց երրորդ տեղը։
Նովոստի–Արմենիա