ՀՅԴ Հադ Դատի հանձնախմբերը, որ գործում են աշխարհի տարբեր երկրներում՝ ավելի քան 6 տասնամյակ, զբաղվում են Հայոց ցեղասպանության ընդունման ու դրա հետ կապված աշխատանքներով, Հայաստանին եւ Արցախին վերաբերող խնդիրներով, Ջավախքի հայության իրավունքների պաշտպանության հարցերով, ինչպես նաեւ նպաստում են տարբեր երկրների եւ Հայասատնի միջեւ հարաբերությունների զարգացմանը:
Այս գրասենյակներից առաջինը հիմնադրվել է Վաշինգտոնում՝ 1984 թվականին: ԱՄՆ-ի Հայ Դատի հանձնախումբն այս պահին աշխատանքներ է իրականացնում մի քանի ուղղություններով. քրիստոնեական եկեղեցիների ունեցվածքի վերադարձման եւ Հայոց ցեղասպանության ճանաչման բանաձեւեր, որոնք ամերիկացի օրենսդիրների քննարկման են ենթակա, ֆինանսական հատկացումներ՝ Ջավախքին ու Լեռնային Ղարաբաղին՝ ամերիկյան կառավարության արտերկրյա հատկացումներից:
Այս համատեքստում, վերջերս Ներկայացուցիչների պալատի դեմոկրատ անդամ Բրեդ Շերմանն կոչ էր արել մեծացնել ԱՄՆ Միջազգային զարգացման գործակալության 2013 թվականի բյուջեով Վրաստանին տրվելիք օգնությունից Ջավախքին հատկացվող մասնաբաժինը: Այս ուղղությամբ USAID-ի հետ երկխոսությունն ընթացքի մեջ է:
"Բացի այն, որ աշխատում ենք մեծացնել Ղարաբաղին եւ Ջավախքին տրամադրվող ֆինանսական օգնությունը, նաեւ փորձում ենք նպաստել Հայաստանի եւ ամերիկյան կառավարության միջեւ առեւտրային հարաբերությունների զարգացմանը: Երեւանում ԱՄՆ դեսպան Ջոն Հեֆերնի հետ ենք հանդիպումներ անցկացնում՝ այս ծրագրերի իրանականցման նպատակով",- ասաց ՀՅԴ Ամերիկայի Հայ Դատնի հանձնախմբի ատենապետ Քեն Հաչիկյանը։
Բրյուսելում բոլորովին վերջերս բացված Հայ դատի գրասենյակի ուշադրության կենտրոնում են ջավախահայության խնդիրները։ Գրասենյակի հետ համագործակցությամբ էլ վերջերս կայացավ Ջավախքի հայկական հասարակական կազմակերպությունների խորհրդի համակարգող Արտակ Գաբրիելյանի այցը Բրյուսել, որի ընթացքում վերջինը ԵՄ պատգամավորներին էր ներկայացրել ջավախահայության խնդիրներն ու դրանց լուծման առաջարկներ:
"Եվրոպացիներն առաջին անգամ մոտիկից ծանոթացան ջավախահայության խնդիրներին: Թե՛ պատգամավորները, թե՛ խորհրդի անդամներն ասացին, որ այսուհետ հստակ ծրագրեր, օրինակներ տրվեն, որպեսզի ԵՄ-ն կարողանա իր ազդեցությունը գործադրել Վրաստանի իշխանությունների վրա",- ասաց Եվրոպայի Հայ Դատի հանձնախմբի փոխատենապետ Գասպար Կարապետյանը։
"Որպես սկսված աշխատանքի շարունակություն, առաջիկայում Վրաստանում ԵՄ գրասենյակի հետ ենք հանդիպելու, որպեսզի բարձրացվեն նույն խնդիրները",- նշեց Ջավախքի հայկական հասարակական կազմակերպությունների խորհրդի համակարգող Արտակ Գաբրիելյանը:
Ֆրանսիայի նախագահական ընտրությունների նախաշեմին առաջատար երկու թեկնածուների հետ աշխատանքներ է իրականացնում Ֆրանսիյաի Հայ Դատի հանձնախումբը: Հայկական մի շարք կազմակերպություններ, այդ թվում եւ Հայ Դատի հանձնախումբը, սատարում են "Սոցիալիստական կուսակցության" թեկնածու Ֆրանսուա Հոլանդին, ով Հայոց ցեղասպոնության հերքումը քրեականացնող օրինագծի պաշտպանն է: Այս թեմայով բանաձեւ ընդունել խոստացել էր նաեւ գործող նախագահ Նիկոլա Սարկոզին:
"Մենք նրան հանդիպեցինք, խոստացավ, որ նախագահ ընտրվելու դեպքում նոր օրենքի նախագիծը կընդունվի: Վստահ չենք, որ խոստումը կկատարի, տեսել ենք` ինչ է եղել այս վերջին 5 տարիներին: Բայց վատ չեն հարաբերությունները",- ասաց ՀՅԴ Արեւմտյան Եվրոպայի ԿԿ ներկայացուցիչ Մուրդ Փափազյանը։
Ռուսաստանում նախագահական եւ խորհրդարանական ընտրություններից հետո հանդիպումներ են անցկացվել ռուսաստանյան իշխանությունների հետ, որպեսզի Հայաստանի պաշտոնական դիվանագիտությանը զուգահեռ՝ նոր խորհրդարանի եւ վարչակազմի հետ քննարկվեն նոր ծրագրեր:
"Մասնավորապես, Ռուսաստանի տարածաշրջանների հետ հարաբերությունների զարգացման ուղղությամբ ենք աշխատում: Նախաձեռնել ենք մահմեդական բնակչությամբ տարածաշրջանների հետ Հայասատնի կապերի զարգացում, օրինակ, Բաշկիրիայի նախագահի գլխավորած պատվիրակությունն առաջիկայում կայցելի Հայաստան",- ասաց Հայ դատի Մոսկվայի գրասենյակի պատաստանատու Յուրա Նավոյանը։
Կանադայի Հայ Դատի հանձնախումբն այս պահին աշխատում է Հայաստանում Կանադայի դեսպանատուն բացելու ուղղությամբ: Հարավային Ամերիկայի Հայ Դատնի հանձնախմբի ջանքերով էր, որ երկու տարի առաջ Երեւանում հիմնվեց Արգենտիանյի դեսպանատուն: Նոր ծրագրեր կան Ուրուգվայում: Ուրուգվայն առաջին պետությունն էր, որ 1965-ին ճանաչեց Հայոց ցեղասպանությունը:
"Ուրուգվայի Կոնգրեսը բյուջեով առանձին գումար է տրամադրել, որ այս տարի կառուցվի Հայոց ցեղասպանության թանգարան",- տեղեկացրեց Հարավային Ամերիկայի հանձնախմբի ատենապետ Պաբլո Կենդիկյանը:
Լիբանանի հանձնախումբն այսպահին հետեւում է Միջին Արեւելքում Թուրքիայի վարած տնտեսական, քաղաքական գործունեությանն ու դրա ազդեցությանը:
Մարտի 30-ից ապրիլի 1-ը Երեւանում անցկացված ՀՅԴ Հայ Դատի հանձնախմբերի խորհրդաժողովը քննարկեց գրասենյակների աշխատանքներն ու առաջիկա ծրագրերը: Այս խորհրդաժողովը 4-րդն էր, առաջին անգամ նման հանդիպում անցկացվել էր 2003 թվականին:
http://www.yerkirmedia.am