Ավստրիայի ներկայացուցչի պատճառով Հայաստանը «Եվրատեսիլ–2014» երգի մրցույթը բոյկոտելու մտադրություն չունի, «Նովոստի–Արմենիա» գործակալությանն ասաց մրցույթի հայկական պատվիրակության ղեկավար Գոհար Գասպարյանը։
Վերջին շրջանում մի շարք երկրներում, մասնավորապես Ռուսաստանում և Բելառուսում, կոչ են անում բոյկոտել «Եվրատեսիլ–2014» մրցույթը` Ավստրիայի մասնակցի` տրանսվիստիտ Կոնչիտա Վուրստի (իրական անունը` Թոմաս Նոյվիրտ) պատճառով։ change.org կայքում քաղաքացիները պահանջում են նաև երաժշտական մրցույթի հեռարձակման ժամանակ չցուցադրել ավստրիացի մասնակցի ելույթը։
«Հայաստանը պաշտոնապես հաստատել է իր մասնակցությունը «Եվրատեսիլ–2014» մրցույթին։ Մենք մտադիր չենք բոյկոտել մրցույթը, քանի որ հարգում ենք կանոնները, որոնց համաձայն մրցույթի մասնակիցները կարող են բեմում ներկայանալ ցանկացած տեսքով։ Հակառակը, մենք հատուկ ոգևորությամբ ենք սպասում «Եվրատեսիլ–2014»–ին»,– ասաց Գասպարյանը։
Ըստ նրա, նմանօրինակ ակցիաները կարող են սովորական PR-քայլ լինել։
«Եվրատեսիլ–2014»–ի հայ մասնակիցը կորոշվի Ամանորի գիշերը Հայաստանի Հանրային հեռուստատեսության տոնական եթերում։
Մրցույթը կանցկացվի հաջորդ տարվա մայիսին Կոպենհագենում։ Մրցույթի բոլոր կիսաեզրափակիչ և եզրափակիչ փուլը կանցկացվի Կոպենհագենի B&W Hallerne համերգասրահում: Մրցույթի կիսաեզրափակիչ փուլերը կկայանան մարտի 6-ին և 8-ին, իսկ եզրափակիչը` մարտի 10-ին:
Կոպենհագենը նախկինում 2 անգամ հյուրընկալել է Եվրատեսիլը՝ 1964 և 2001 թվականներին, իսկ 2005-ին այստեղ անց են կացվել մրցույթի 50-ամյակին նվիրված տոնակատարությունները:
Այս տարի հիմնականում միջոցների բացակայության պատճառով մրցույթի մասնակցությունից հրաժարվել է Բուլղարիան, Սերբիան, Չեխիան, Սլովակիան, Կիպրոսը, Խորվաթիան և որոշ այլ երկրներ։
Հայաստանը մասնակցում է «Եվրատեսիլ» մրցույթին` սկսած 2006 թվականից։ 2008 թվականին լավագույն արդյունքը ցույց տվեց Սիրուշոն` զբաղեցնելով չորրորդ տեղը։
2013թ.–ին Հայաստանը ներկայացրեց Dorians ռոք խումբը, որը Շվեդիայի Մալմո քաղաքում տեղի ունեցած «Եվրատեսիլ–2013» երգի մրցույթի ժամանակ «Lonely Planet» երգով զբաղեցրեց 18–րդ տեղը։
Նովոստի–Արմենիա