Հունվարի 27-ին՝ ժամը 19.00, Երեւանի «Արամ Խաչատրյան» համերգասրահում տեղի կունենա հայտնի հայազգի սովետական կոմպոզիտոր Միքայել Թարիվերդիեւին նվիրված համերգ: Երեկոյի ընթացքում Հայաստանի պետական Երիտասարդական նվագախմբի կատարմամբ կհնչեն մեծանուն կոմպոզիտորի Ջութակի կոնցերտը և կոմպոզիտորի՝ հայտնի և սիրված կինոնկարների համար գրված մեղեդիները։
Համերգին հանդես կգան հայտնի ռուսաստանյան եւ հայ երաժիշտներ՝ ՌԴ ժողովրդական արտիստ Դմիտրի Պեւցովը, դուդուկահար Գեւորգ Դաբաղյանը, ռուսաստանյան դաշնակահար Ալեքսեյ Գորիբոլը, ջութակահար Հայ Կազազյանը եւ բարիտոն Գեւորգ Հակոբյանը: Համերգը կվարի Վերա Թարիվերդիևան։
Համերգի կազմակերպիչներն են ՀՀ և ՌԴ մշակույթի նախարարությունները, Հայաստանի պետական երիտասարդական նվագախումբը։
Հայտնի հայ կոմպոզիտոր, Ռուսաստանի ժողովրդական արտիստ Միքայել Թարիվերդիեւը ծնվել է 1931թվականի օգոստոսի 15-ին: 1957 թվականին ավարտել է Մոսկվայի Գնեսինների անվան երաժշտական-մանկավարժական ինստիտուտի (այժմ՝ Ռուսաստանի երաժշտական ակադեմիա) ստեղծագործական բաժինը հայազգի աշխարհահռչակ կոմպոզիտոր Արամ Խաչատրյանի ղեկավարմամբ: Միքայել Թարիվերդիեւը առավել հայտնի է հանրաճանաչ ֆիլմերի համար գրված երաժշտությամբ:
Նա կինոյում ստեղծագործել է 1958 թվականից. հեղինակ է շուրջ 130 ֆիլմի երաժշտության, որոնց բնորոշ է ինքնատիպ մեղեդայնությունը. լավագույններից են՝ «Եղջերու Արքան», «Գարնան տասնյոթ ակնթարթ», «Տասնհինգերորդ գարունը» (1973թ.), «Ճակատագրի հեգնանքը կամ Բաղնիքդ անուշ» (1976թ.) եւ այլն: Կոմպոզիտորը ստեղծագործել է ինչպես էստրադային, այնպես էլ դասական ժանրում: Ստեղծագործել է երաժշտության գրեթե բոլոր ժանրերում: Գրել է «Ո՞վ ես», «Կոմս Կալիոստրո», «Սպասում» օպերաները, «Ստվեր», «Երջանկության պոեմ», «Աղջիկը և մահը», «Աղջիկը գնդի վրա» բալետները, «Չեռնոբիլ» երգեհոնային սիմֆոնիան, կոնցերտներ ձայնի եւ նվագախմբի, ջութակի եւ նվագախմբի, երգեհոնի համար:
NEWS.am STYLE