Վրաստանի մայրաքաղաք Թբիլիսի կատարած պաշտոնական այցի շրջանակում Երեւանի քաղաքապետ Տարոն Մարգարյանի գլխավորած պատվիրակությունը մասնակցել է Երեւանի պուրակի բացման հանդիսավոր արարողությանը:
Երեւանի քաղաքապետարանի տեղեկատվության եւ հասարակայնության հետ կապերի վարչությունից հայտնում են, թե Թբիլիսիի հայկական Հավլաբար թաղամասի այլեւս պաշտոնապես երեւանյան անվանակոչված պուրակի հուշատախտակի հանդիսավոր բացման պատիվը վերապահվել է երկու մայրաքաղաքների քաղաքապետերին: Երեւանի պուրակի ստեղծման նախաձեռնությունը եւ իրականացումը Թբիլիսիի քաղաքապետարանինն է: Ներկաներին ուղղված ողջույնի խոսքում Թբիլիսիի քաղաքապետ Գեորգի Ուգուլավան նշել է, որ հայկական ավանդույթներով հարուստ թաղամասում՝ Հավլաբարում, այսուհետ իր ուրույն տեղը կունենա նաեւ Երեւանի պուրակը: Նա նաեւ հավելել է, որ Թբիլիսիի քաղաքային իշխանությունն իրականում մեծ սիրով է կյանքի կոչել Երեւանի պուրակ ստեղծելու ծրագիրը, հատկապես հաշվի առնելով, որ սա եւս մեկ հիմնաքար կավելացնի երկու ժողովուրդների դարավոր բարեկամությանը. «Ինձ համար նաեւ շատ կարեւոր է Երեւանի քաղաքապետի հետ ունեցած մեր լավ բարեկամությունը, ինչն իր հերթին եւս կարեւոր խթան է, որ Թբիլիսին ու Երեւանը սերտորեն համագործակցեն: Եվ այս տեսանկյունից ուզում եմ առանձնակի կարեւորել նաեւ այս հարցում քաղաքապետ Տարոն Մարգարյանի պատրաստակամությունն ու ջանքերը, ինչն արդեն իսկ վստահություն է ներշնչում, որ երկու մայրաքաղաքների համագործակցության շրջանակներն առաջիկայում անպայման կընդլայնվեն»,- նշել է Գեորգի Ուգուլավան՝ հավելելով, որ Թբիլիսիի քաղաքային իշխանությունն էլ իր հերթին կանի հնարավորը, որպեսզի Վրաստանի մայրաքաղաքի սրտում ձեւավորված նոր պուրակն իսկապես սիրված հանգստի գոտի դառնա բոլորի համար:
Երեւանի քաղաքապետ Տարոն Մարգարյանն իր խոսքում նախ շնորհակալություն է հայտնել Գեորգի Ուգուլավային հրավերի եւ ջերմ ընդունելության համար՝ ընդգծելով, որ Երեւանի եւ Թբիլիսիի միջեւ կապերի ամրապնդման գործում իրապես մեծ է Թբիլիսիի քաղաքապետի անձնական ներդրումը: Տարոն Մարգարյանը նաեւ համոզմունք է հայտնել, որ Երեւանի պուրակն իսկապես սիրված վայր կդառնա ինչպես Թբիլիսիի բնակիչների, այնպես էլ հազարավոր հյուրերի համար. «Սխալված չեմ լինի, եթե ասեմ, որ այսօր հայ եւ վրացի ժողովուրդների դարավոր բարեկամության պատմության մատյանում եւս մեկ նշանակալի էջ է ավելանում: Մեր բարեկամ քաղաք Թբիլիսիի սրտում՝ Վրաստանի բազմազգ մայրաքաղաքի հայկական հայտնի Հավլաբար թաղամասում, Հայ առաքելական Սուրբ Էջմիածին եկեղեցու հարեւանությամբ բացվեց Երեւանի պուրակ: Առիթն օգտագործելով՝ ուզում եմ շնորհակալություն հայտնել Ձեզ, պարոն քաղաքապետ, եւ ի դեմս Ձեզ, նաեւ Թբիլիսիի քաղաքային խորհրդին՝ պուրակի անվանակոչման որոշումը կայացնելու համար: Եվ ես համոզված եմ, որ առաջիկայում երկուստեք մեր գործընկերային համագործակցության ծրագրերն իսկապես նոր թափ կստանան: Ինչ վերաբերում է Երեւանի անվան այս պուրակին, ապա կասկած անգամ չունեմ, որ կարճ ժամանակում այն կդառնա բոլոր թբիլիսցիների ու Թբիլիսիի հազարավոր հյուրերի հանգստի ու ժամանցի սիրված վայրերից մեկը»,- ընդգծել է Տարոն Մարգարյանը:
Հանդիսավոր արարողությունից հետո Երեւանի քաղաքապետ Տարոն Մարգարյանը ջերմ մթնոլորտում շփվել է հայ համայնքի ներկայացուցիչների հետ, լսել նրանց բարեմաղթանքներն ու առաջարկները: Քաղաքապետը տեղեկացրել է համայնքի ներկայացուցիչներին, որ Երեւանի եւ Թբիլիսիի քաղաքապետարաններն առաջիկայում կստորագրեն նոր համաձայնագիր, ինչը ենթադրում է երկու քաղաքների միջեւ առավել սերտ համագործակցություն եւ, օգտվելով առիթից, առաջարկել է հայ համայնքին ակտիվորեն ներգրավվել իրականացվելիք ծրագրերում: