Ապրիլի 24-ին Նիդերլանդների Ասեն քաղաքում, Հայոց ցեղասպանության 98-րդ տարելիցի կապակցությամբ, տեղի ունեցավ հիշատակի միջոցառում, որը կազմակերպել էր Հոլանդահայ կազմակերպությունների ֆեդերացիայի «Ապրիլ 24» կոմիտեն:
Արարողությունը սկսվեց Ասենի «Դե Բոսկամպ» գերեզմանատանը Հայոց ցեղասպանության զոհերի հիշատակին կանգնեցված խաչքարի մոտ ծաղկեպսակների զետեղմամբ:
Եղեռնի զոհերի հիշատակի միջոցառումն իր խոսքով բացեց Ամստերդամի հոգևոր հովիվ Տեր Տարոն քահանա Թադևոսյանը: Մասնակիցներին իր ուղերձը հղեց Նիդերլանդներում ՀՀ դեսպան Ձյունիկ Աղաջանյանը, ով իր խոսքում շեշտեց Հայոց ցեղասպանության միջազգային ճանաչման ուղղությամբ պայքարի անհրաժեշտությունը և դրան հասնելու համար միասնական ջանքերի կարևորությունը: Նա ներկաներին հորդորեց վառ պահել թուրքական յաթաղանից փախչող մոր կերպարը, ով իր մի ձեռքում բռնել էր իր զավակին, իսկ մյուսում` գրկել էր գիրքը, քանզի նա դրանով իր հետ տանում էր իր ժողովդրի ապագան` ի դեմս իր զավակի, ու նրա անցյալը, պատմությունն ու հիշողությունը, առանց որի որևէ ժողովուրդ չի կարող պահպանել իր ինքնությունը:
Միջոցառումանը ելույթներով հանդես եկան նաև Հոլանդահայ կազմակերպությունների ֆեդերացիայի` «Ապրիլ 24» կոմիտեի նախագահ Նուբար Սիփանը, քուրդ լրագրող և «Հայ համազգային շարժումն ու 1915թ.-ի ցեղասպանությունը» գրքի հեղինակ, դոկտոր Ռեչեփ Մարաշլին:
Նույն օրը 24-ին Նիդերլանդների մեկ այլ՝ Ալմելո քաղաքում, Հայոց ցեղասպանության 98-րդ տարելիցի կապակցությամբ, տեղի ունեցավ հուշ-երեկո, որը կազմակերպել էին Ալմելոյի Հայ Առաքելական եկեղեցու վարչությունը և ՀՅԴ Նիդերլանդների Հայ Դատի հանձնախումբը` Նիդերլանդների Հայ բարեգործական ընդհանուր միության և Նիդերլանդների Հայ մարմնակրթական ընդհանուր միության հետ համագործակցությամբ:
Հուշ-երեկոն սկսվեց Հայոց ցեղասպանության զոհերի հիշատակին նվիրված պատարագով, որին մասնակցեցին էին նաև Ամելոյի քաղաքապետարանի և Ասորական եկեղեցու հոգևոր ներկայացուցիչները: Պատարագին հաջորդեց Եղեռնի հուշարձան-խաչքարի մոտ ծաղկեպսակների զետեղման արարողությունը:
Հուշ-երեկոյին Հայոց ցեղասպանությունը դատապարտող ելույթներով հանդես եկան Ալմելոյի Հայ Առաքելական եկեղեցու վարչության նախագահ Օնիկ Գելիչին, Քրիստոնեական միություն կուսակցությունից Նիդերլանդների խորհրդարանի անդամ Հերտ Յան Սեյխերսը, Նիդերլանդների Հայ Դատի հանձնախմբի անդամ Մինաս Արսենյանը:
Հուշ-երեկոյի ներկաներին իր խոսքով դիմեց նաև Նիդերլանդներում ՀՀ դեսպանը` նշելով. «Այն ժամանակ, երբ աշխարհն առաջ է գնում դեպի ժողովրդավարություն և մարդու իրավունքների պաշտպպանություն, ուժային քաղաքականությունն է մեջտեղ գալիս, երբ հարցը վերաբերում է Հայոց ցեղասպանությանը: Այն ժամանակ, երբ միջազգային հանրությունը ձգտում է համագործակցային մեխանիզմների վրա հիմնված աշխարհ կառուցել, ռազմավարական նկատառումներն են սկսում գերակշռել, երբ հարցը վերաբերում է Հայոց ցեղասպանությանը: Այն ճշմարիտ փորձաքար է դարձել աշխարհի ու մարդկության համար` որևէ տեղ ու որևէ ժամանակ այս ամենասարսափելի հանցագործության կրկնումը թույլ չտալու համար: Ամեն անգամ, երբ աշխարհը տեղի է տալիս թուրքական պահանջներին, փոխանակելով դրանք քաղաքական կամ տնտեսական օգուտների հետ, դրանով երկարաձգում է հանցագործությունը, և թողտվությամբ վերաբերվում ու կործանիչ հարված հասցնում միջազգային մարդասիրական ու մարդկային արժեքներին»:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ